Audrey West performs “Where do I come from'‘

Credits:

Director: Steve Bliss

Production Co: OBR Studios 

Transcript of the poem below:

“How did you end up here? Where do you come from?

I remember a place
Where I am cradled by the Mountains
Rocked by the sea…

Mi memba a plies
We di mountin dem kriegl mi
We di sii rak mi in aar skort
Op di goli, pan tap a di hil
Mi kyan si faar faar
Plenti chrii, plenti griin, plenti sii

Memba a plies
We dem nuo mi niem
Dem nuo mi mada, nuo mi faada
Nuo mi fambili
Mi a smadi

Mi nuo se mi kom fram wie bak
A Timboktuu dem kaal it?
Mi piipl dem chravl a Hiijip
Riich bak uom,
A di mountin an di sii

Iz ou mi hen op ier?

Mi nuo se som a wi
De pan buot
Pak op pak op, stingk op stingk op
Kyaan briid
Bot wi riich

A wan plies dem kaal Jamieka
Nier di mountin, bai di sii
We dem
Mek wi wok
Brok wi bak
Tek wi uman
Kil wi pikni
Fi notn

Bot iz ou yu en op ier?

Mi nuo se mi kom fram faar faar
Mosi wan plies we niem Fraans
We dem fait.
Nier di mountin, bai di sii
Fait so bad, dem kaal dem
Espeute, fi suod.
Dem kaal dem Juu
Mek dem ron

Chravl faar faar
Riich klier a San Domingue
We dem
Mek dem wok
Bruk dem bak
Tek dem uman
Kil dem pikni
Fi notn

Mais d’ou viens tu?

Ron klier a Virginia
Weh dem
Mek dem wok
Bruk dem bak
Tek dem uman
Kil dem pikni
Fi notn

Bot iz ou yu en op ier?

Mosi chruu wan plies we niem India
Nier di mountin, bai di sii
Dem bring wi bak
Fi wok
Til wi bak brok
Lef wi uman
Lef wi pikni
Fi likl ar notn

¿Pero, como llegaste aquí?

Ron we, beli onggri
Go klier a Panama
Nier di mountin, bai di sii
Luk fi wok
Til mi bak brok
Dem tek mi uman
Kil mi pikni
Fi notn

Bot, a we yuu kom fram?

Mosi fram wan plies dem kaal Skatlan. Plenti hil,
An di sii skort uova aar fiit
Nier di mountin, bai di sii
Iz ou yu gaan klier a Skatlan?
Iz ou yu en op dier?

Onggri beli
Kech buot, kom a Hingglan
Riich a Soutamton bai di sii
Riich a Landan. Bes suut
Fi luk wok
Til mi bak brok
Sen fi mi uman
Dem kil mi pikni
Fi notn

Mi no si no sii.
Mi no si no mountin.
Grie so til.
Gaan bak uom.
We dem nuo mi niem,
Nuo mi fambili
Mi a smadi
Tek mi uman
Lef mi pikni
Dem aal rait

How did you end up here?
O le wyt t’in dod?

Pikni riich a Naat Wales
I’ve come a long way baby
Back to the mountains,
Back to the sea
Back home, to
Luxe, calme, et volupté”

Homage to my parents
Alvin and Mary West

Copyright: Audrey West
June 2020